الأربعاء، 5 سبتمبر، 2012

شويــّات

شويّات ونكون سوا
في المكان اللي بتحبيه
بعيد عن كل الناس
انا وانتِ وبس
مش هتأخر
هما يادوب شويّات

الخميس، 23 أغسطس، 2012

نـــــــــــداء


نداء الي روحي الشريدة
 ارجعي اليّ 
من مساكنك البعيدة 
أريد ان اكون إنسان
وليس شبح
في دنيا غريبة

الجمعة، 27 يوليو، 2012

إضحك

 

إضحك

ضحكك

دمعك

مش  فارق  مع  كتير 

لكنه  فارق  معايا

سيب  بكرة  لبكرة

ماتفكرش

ماتفهمش

وقابل  الشر  بخير

الجمعة، 4 مايو، 2012

مجرد حـــــــــــــلم

video

عارف لما تكون عاوز تتكلم كتير اوي وفجأة ماتقدرش تنطق
مش مهم ايه اللي اِتقال
المهم ايه اللي حصل
لما تزعل أوى على حاجة راحت منك

غمض عينيك وإفتكر كل حاجة ربنا رزقك بيها

وإحمد ربنا عليها
علي فكرة انا مش زعلان منك
انا لو زعلان هبقي زعلان عليا
تعرف نفسي اوي نخرج سوا
بس بشرط تجيبلي وردة
بقولك اخوها راح يعمل قيد عائلي وفجأة
اكتشف ان أمه الزوجة رقم خمسة
مسير الحق يرجع لأصحابه يابشمهندس
أذا كان بيعاملك كده في الخطوبة
اومال هيعمل معاكي ايه بعد الجواز
ياواد بقولك زهقت من كل حاجة
ماتخدش بالظاهر دا اللي جوه مش ظاهر
 عارف لما يبقي فيه ست عافية وتمسك سجادة تنفضها بالأوي
اهو انا حسيت اني كده
ايه الست ؟    لا طبعا السجادة
خلاص الحمد لله بطلت سجاير
وبقيت بشرب مخدرات 
أوعي تكون اتجوزت من ورايا
ولا وراكي ولا أدامك
 وهو فيه حد كده اصلا اليومين دول
احنا في زمن النفخ
نص ثورة زي بالظبط التوك توك دا
لا هو عربية ولا هو موتوسيكل
لا تعبد الله كي يعطيك ولكن اعبده كي يرضي
فأن رضي عز وجل فسوف يزهلك عطائه
بس هنروح طيران ونرجع بالقطر
خللي بالك منهم
في عنيا ياعمي
حاجة سهلة اوي ماتشغلش بالك انت
الشر مفيش اسهل منه
انا بستغرب ازاي تعمل كده
في حد يخطب اتنين في نفس الوقت !
نفسي اوي يبقي عندي ولد
حتي لو ماتجوزتش بفكر اشتريه
 

كل دي محادثات ومواقف مع ناس كتير عشت معاهم
جتني في حلم زي ماهي كده بالظبط 
في الخلفية سمعت صوت عذب جدا يقرأ أية الكرسي
وبعد كده الفجر أذن مش عارف ليه
من ساعتها حاسس ان روحي رايحة مني
وان الموت قريب جدا
حين أموت سيموت معي حبي , حلمي , ضحكتي , بكائي
وسأبقي ذكري عابرة
فقط سيبكي من يحبني  ولا يبالي من يكرهني
وسينصدمون أهلي واصدقائي
ولكن تأكدو كنت احبكم جميعاً
فأذكروني بدعوة صادقة
وهذه كل وصاياي
 
 
 
 
 
 



 


الأربعاء، 8 فبراير، 2012

نقطة


نقطة فوق نقطة

يبقوا بحر

والنقطة لو مش في السما

 يبقي لا وجود للمطر

والنقطة فوق الحروف 

تغير معاني الكلام

بيها جايز تكون الحياة شر

ومن غيرها جايز تكون للحياة سر

                                            لا تستهينوا
بالنقطة
                                                           فأحيانا تغير
  مصيرانسان

الجمعة، 18 نوفمبر، 2011

سلطة


سلطة ايه اللي عاوزينه يسلمها
ويسلمها لمين
وازاي
ابقوا قولولي والنبي علي مكان وميعاد التسليم
لو حد عرف حاجة
مفيش حد فاهم  اي حاجة
وبجد
بجد
بقت اخر
سلطة

الجمعة، 4 نوفمبر، 2011

رسايل


مش باقي منها غير شوية رسايل
يقرأهم في اشتياق والدمع علي خده سايل
ينام من التعب وهي من جواه
بتجري في دمه اصلها كتير وحشاه
يتمني يحلم بيها
وهي في توب الملايكة
يشوفها
يلمسها
يحضنها
يهمس لها بهمسة
يفرحوا سوا بحبهم
يتمايلوا
يرقصوا
علي صوت دقات قلوبهم
صحي من نومه
وفحضنه رسايله
نايمة جانبه وردة كانت منها هدية
اخدها بين ايديه
باسها
حضنها
قالها 
بحــــــبـك


happy
valentine's
day

الاثنين، 17 أكتوبر، 2011

صعب



ساعات ربنا بيدينا حاجات
واحنا مش بنحافظ عليها
فكر لوحدك شوية !!
وافتكر ايه الحاجات اللي ضاعت منك
وبتندم عليها لحد دلوقتي

يوووووووووه كتير
واحد صاحبك
حد حبك
فلوس
شغل معين
او فرصة مش ممكن ترجع تاني
طب فكر تاني  بس المرة دي 
في اصعب موقف قابلك
او هيقابلك
انك تفقد حد غالي عليك ( الفقد هنا مش موت وبس )
انك تبعد عنه وخلاص لأي ظرف كان
صعب الموقف دا ؟
انك تدخل امتحان صعب
وانت اصلا مبصتش في كتاب مادة الامتحان دا
صعب الموقف دا ؟
طب لو حد قفل عليك باب اوضه صغيرة ضلمة
وحبس معاك حد بتكرهه
او حيوان بتترعب منه ( كلب , قطة , فار ............. )
صعب الموقف دا ؟
في مواقف كتير اوي صعبة
عدت علينا
وعدينا احنا عليها
وبنعرف من خلالها
اد ايه ربنا بيحبنا
بس تعرف ايه هيا اصعب حاجة
انك تفقد الاحساس بأي حاجة حواليك
تفقد احساسك بحب اصحابك ليك
تفقد احساسك بأي حاجة حلوة كانت بتفرحك
والاصعب انك تفقد احساسك بنفسك وبقيمتك عند ناس بتحبهم

حد فاهم حاجة ؟


عارف الاجابة طبعا ( لا )

ولا انا

ودي برضه من الحاجات الصعبة اوي